ଭୋକ : ଏକ ଭୂତାଣୁ ଜନିତ ରୋଗ

ମଲାପରେ ବି 

ପୁନଃଜନ୍ମ ନିଏ ଭୋକ

କେଉଁ କୁଳ, ଗୋତ୍ର, ଧର୍ମରେ,

ଚାଷୀ,ମୂଲିଆ ଅବା

ନେତା,ଗୁମାସ୍ତା, ବଡ଼ ବଡ଼ିଆଙ୍କ ପେଟରେ !

ସ୍ଥାନ, କାଳ, ପାତ୍ର ବୋଲି କିଛି ଥାଏନା,

ମହାମାରୀ,ମହାବାତ୍ୟା ବି ସେ  ମାନେନା 

ଅସମୟରେ  ମାଡିପାରେ

ଅସମ୍ଭାଳିଆ ରାଜନୀତି ,

ପଦୁଅଁ ଶ୍ରୀ,ଭୂଷଣ,ବିଭୂଷଣ

ଲଭାଲଭି କରେକି କି କ'ଣ ?

ପ୍ରୟୋଗି ଯାଏ କିନ୍ତୁ

ଜଣା ଅଜଣା ଗୋଡ଼ଟଣା, ନୀତି କୌଶଳ 

ଗୁଣ ଗାରିମା ଖୁଣ ଖାରିମା

ଚର୍ଜି ଗର୍ଜି ଚର୍ଚ୍ଚିଯାଏ  

ଅର୍ଜିବା...ତାକୁ ଇ' ଜଣା ,

ଅବଶୋଷ ! 

ଚା' ଦୋକାନଟା ଖୋଲାଥା'ନ୍ତା ଭଲା,

ସିଗାରେଟ୍ ର ଧୁ ଧୁ ଧୂଆଁରେ 

ଠେଲି ଦେଇଥାନ୍ତ ରୋଗ

ବାୟୁମଣ୍ଡଳ ସେ ପାଖକୁ ,

ଝାଡ଼ି ଦେଇଥାନ୍ତ ଝଡ଼ 

ବଙ୍ଗୋପସାଗର ଆରପଟକୁ ,

ସଂକ୍ରମି ଗଲାଣି  "ବାଃ ବାଃ ଭୋକ"

ତା' ଲାଗି କିଏ ଭାକ୍ସିନ୍ ଖୋଜନ୍ତନି

ତୁଳସୀ, ମହୁ, ଗଙ୍ଗାଜଳ

ଗୀତା,ଭାଗବତ, ଚଣ୍ଡୀ ପୁରାଣ,

ହେ ମଣିମା ! ହୋ ଭକତେ !

କିଏ କିସ ଜାଣିଚ ହେ,

ଶୀଘ୍ର ବତାଅ,

ମନମସ୍ତିଷ୍କ ରକ୍ତ ଚରି  

ଭେଟିଲାଣି ଶେଷ ପର୍ଯ୍ୟାୟ !

୨୦/୦୫/୨୦୨୦