ପକୁଡି ପାଗ

-ଓଃ ଦିହଟା କାଇଁ ମାନ୍ଦା ମାନ୍ଦା ଲାଗୁଚି ମ । ପାଗଟା ବି ଏମିତି ମେଘୁଆ ହେଇଚି  ଯେ....କୁଆଡେ ଟିକେ ଗୋଡ଼ କାଢି ହେବନି !

ହଇଓ ଚା' ଟିକେ ହବ ? ମୋଡି ମାଡି ହେଇ ପଚାରିଲେ ଦାଶବାବୁ ।

- "ହୁଁ ! ଟିକିଏ ଅପେକ୍ଷା କର । ନେଇକି ଯାଉଛି"  ରୋଷେଇ ଘର ଭିତରୁ ଉତ୍ତର ଦେଲେ  ଦାଶବାବୁଙ୍କ ସ୍ତ୍ରୀ ।

- ହଇରେ ! ତେଲ ଛଣା ବାସ୍ନା ହଉଚି....  କଣ ପକୁଡି ଫକୁଡି ଛାଣୁଛ କି' ହୋ ! 

- ମନଟି ତ ଅଛି । ଏତେ ବୁଲେଇ ବାଲେଇ କାଇଁ କହୁଚ କହିଲ ? ହଉ କରିଦେଉଛି ।

- କରିବ ଯଦି.....ତେବେ ଚା' ଟା ନେଇଯାଅ । ପକୁଡି ଖିଆ ସରିଲା ପରେ ଚା' ପିଇବା .....ନା କଣ କହୁଛ ?

- "ମଲା... ମୁଁ କଣ କହିବି ଯେ ! ତମ ଇଚ୍ଛା ...." କହି ରୋଷେଇ ଘର ଭିତରକୁ ଚାଲିଗଲେ ଦାଶବାବୁଙ୍କ ସ୍ତ୍ରୀ ।

(କିଛି ସମୟ ପରେ)

-ହିଇରେ ! 

- କଣ ହେଲା ? 

-କଅଁଳିଆ ଭୃସୁଙ୍ଗ ପତ୍ର ଯୋଡ଼େ ବାଡିରୁ ଆଣି ପକେଇବ ତ । 

- ହୁଁ

- ଆଚ୍ଛା ଆମର ଯୁଆଣି ଅଛି ? 

- ହଁ

- ସେଥିରୁ କିଛି ପକେଇଦେବ । ଗରିଷ୍ଠ ଜିନିଷ ଏ ବୟସରେ ଉଦର କଣ ହଜମ କରିପାରୁଛି !

-ହଇରେ ଶୁଭୁଚି ! 

-ହଁ, ଯାଉଛି 

- ପିଆଜ ଟିକେ ଲଙ୍କା ଟିକେ ଚୁନେଇ କରି କାଟି ପକେଇବ !      

- ହଉ

- ହେଇଟି ଶୁଣ ମ !

-ପୁଣି କଣ ହେଲା ? ଅଧା ବୁଲି ପଡି ପଚାରିଲେ ଦାଶବାବୁଙ୍କ ସ୍ତ୍ରୀ ।

- ବେଶି ଆଣ୍ଟୁଆ କରିବନି ,ନରମ ପାଗ କରିବ ହେଲା ।       ଅଳପ ଯୋଡ଼େ କରିବ ଆଉ....

-ହଉ, କହି ରୋଷେଇ ଘରକୁ ପୁଣି ଚାଲିଗଲେ ଦାଶ ବାବୁଙ୍କ ସ୍ତ୍ରୀ ।

-ହଇରେ ଶୁଭୁଚି !

-ଓ ହୋ ... କଣ ହେଲା ? ଏଥର ଟିକେ ଭାରି କଣ୍ଠରେ ରୋଷେଇ ଘରୁ ପଚାରିଲେ ବାବୁଆଣୀ ।

- ଖାଇବା ସୋଢ଼ା ଟିକିଏ ନାକୁ ପକେଇବ । ତେଲ ପିଇଯିବ ନୋହିଲେ ।

(କିଛି ସମୟ ପରେ ରୋଷେଇ ଘରୁ ଧାଇଁ ଆସି ,ଦାଶବାବୁଙ୍କ ସ୍ତ୍ରୀ)

-ହେଇଟି ! ପଞ୍ଜାବୀ ଟା ଗଳେଇଲ ଗଳେଇଲ !

- କାହିଁକି ? ଆଶ୍ଚର୍ଯ୍ୟ ହେଇ ପଚାରିଲେ ଦାଶ ବାବୁ ।

- ବେସନ ସରିଯାଇଛି !

- ବିଚରା ପକୁଡି ଆଶାରେ ଲାଳ ଗଡୁଥିବା ପାଟି ହଠାତ୍ ଆମ୍ବିଳା ହେଇଗଲା । ଗ୍ୟାସ ହେଇଯିବା ଭୟରେ ଆଗୁଆ ବୈଦ୍ୟନାଥ ଆଲୋଭେରା ଜୁସ୍ ପିଇ ସାରିଥିବା ପେଟ ବି ପଛକୁ ନସିଗଲା ।

- ଅଶାନ୍ତିରେ ଦାଶବାବୁ ମୁହଁକୁ ଶୁଖେଇ ଧୋତି ପଞ୍ଜାବୀ ପିନ୍ଧି ଜୋତା ଗଲେଇଛନ୍ତି ଘରଣୀ ଆସି ପହଁଚି ଗଲେ ।

- ହଇ ହେ ! ଏତେ ବେଳ ହେଲାଣି ଆଉ ବେସନ କଣ ଆଣିବ  ! 

- ଆଉ ?

- କୁଳ ସାହୁ ଦୋକାନରୁ ପକୁଡି ଠୁଙ୍ଗେ ନେଇ ଆସିବ । ଆଉ ହଁ କାକରା ଯୋଡ଼େ  ଆଣିବ ତ । କୁଳ ସାହୁ କାକରାଟା ବହୁ ଦିନରୁ ପାଟିରେ ବାଜିନି....

- ହଉ.... ଧିମା ସ୍ୱରରେ କହିଲେ ଦାଶବାବୁ ।

ଜୋତା ମାଡି   ଦି' ପାହୁଣ୍ଡ ଆଗକୁ ଯାଇଛନ୍ତି କି ନାହିଁ, ପଛରୁ ଶୁଭିଲା...

"ହଇଓ , ଆସିଲା ବେଳେ ରମେଶ ଦୋକାନରୁ ଚା' ଟା  ପିଇଦେଇ ଆସିବ !"

          Photo : Sangram Keshari Senapati